ماسكات للوجه

1- خلطة البطاطا والحليب والنشا

المقادير:
بطاطا مغلية بماء + ملعقة كبيرة حليب بودرة + ملعقة متوسطة نشاء + وملعقة ماء ورد
واللي بشرتها دهنية او مخلوطة نفسي تضيف ملعقة عصير ليمون
وتضربين المقادير بالخلاط وراح يطلع كأنه خليط كيك ثقيل بيكون دافي خذيه وحطيه ع وجهج ورقبتج لمدة نصف ساعة وبعدها اغسليه بماء فاتر "بدون صابون" وبعدها خذي مكعبات ثلج ماء ورد ومرريها على وجهج

فائدة الخلطة : تبيض وتصفي وتوحد لون بشرة الوجه والعنق

2- قناع الشوفان

المقادير :
ملعقة صغيرة خميرة البيرة - ملعقة عصير ليمون - ملعقتين شوفان مطحون - ملعقتين زبادي "منتهيية صلاحيته" وخلطيهم وحطيهم على وجهج لمدة نصف ساعة
فائدة القناع : يصفي وجهج من آثار الحبوب والله يابنااات ان يخفف اثار الحبوب بطريقة عجييبة

3- خلطة الطحينية والمرة

مكوناتها :
ملعقة صغيرة مرة مطحونه
ملعقتين كباار طحينية سائلة حقت التمر
وحطيها على وجهج لمدة ساعة او ساعتين ولما تغسلينها لاتغسلينها بصابون فقط ماء دافي

فائدة الخلطة : تفتح لوون البشرة وتمحي آثار الحبوب

4- مكعبات البطاطا

مكوناتها
ملعقتين زبادي - بطاطا مبشورة - حليب بودرة ملعقتين - وشوية ماي ورد
وحطوها بقوالب ثلج وخلوها بالفريزر وبعدها مرروها على وجهكم وتصير كأنها ماسك وخليها لمدة ساعتين

فائدتها : تشد الوجه وتبيضة وتصفيية من الحبوب وآثارها

5- قناع العسل بالزبادي

مكوناته : ملعقتين عسل طبيعي - ملعقتين زبادي - بياض بيضة
اخلطيها وحطيه ع وجهج لمدة نص ساعة

فائدته : يرجع الحيوية لوجهج ويخليه نضـر ويصفيه من الحبوب والله يابنات اللي وجهها تعبان من السهر تحط هالقناع وصدقوني راح تستانس ع النتيجة

6- قناع ماقبل المكياج
بنات لما تكون عندكم سهـرة ..أو عزيـمة..حطوا هالقناع وراح تدعون لي من قلبكم
ملعقتين نشاء وملعقتين ماء ورد حطيهم على وجهج (لازم لمدة ساعتين او ساعة ) قبل المكياج ..وغسليه بماء فقط وبعدها نشفي وجهج وحطي المكياج عادي .. وبعد ماترجعين من مكان سهرتج غسلي المكياج بصابونه طبية ..ونظفي وجهج بتونك وبعدها خذي نص برتقالة ومرريها على وجهج وخليها لحد ماتنشف "ماتطول" وغسلي وجهك

--------------------------
منقول للاستفادة